lunedì 14 giugno 2010

TOTU EST POESIA

Paola Alcioni












Castia, intzimiat a proi.
Annuadas a bentu arrevesciu
nais de ghisciu
trassant in sa bizarra 'e su celu
sinnus chi no cumprendu.
Ma no ddi fait nudda: totu est poesia.

Proit, fillu miu, sa dì afrigia
stiddiendi in pous di annugiu
arraminadas lagrimas de grunda.
Fintzas in su stugiu 'e is sentidus
tzivinat e s'unda de Maistrali
incrubat acuzzas tzinnigas de dolori.

Po m'avesai a su marigosori 'e sali
de custu mali de bivi, deu, sossoìni
de pena, in s'arena arrexinis emu postu.
Nùas mi ddas lassàt 'onnia sbentuliàda
e no 'nd allebiàt s'acua s'asciutori.
Imoi, candu sa mannària 'e su celu
in cascias de umbra
is neas s'aguantad asurìa,
de sa manu mia si strobint arannias
sintzieddus i arrandant tirinnia de fueddus
in sa trama tirada de s'abetu. Aici
sciortu su spantu de sogas di apretu
totu si fait cantu e poesia
in custa 'ia de nebida e de vida.
E mancai si scurighint is bisus
in is trobeas de su tempus
no lassu prus chi arrisus axedint
che binu intristau. Tui mi dd'as imparau,
limbichendi de pixidas currentis
de axìu su prexu di essi biu.

Castia maìstu miu piticu, bisadori,
de bisus mannus mannus: no proit
prus. Nais de craboni
trassant in sa pruinca 'e su celu
bolidus chi si stesiant.
Ti 'nd'as andai tui puru?
Si strobint de sa manu mia in su saludu
de cilixia caus e de ressinniu.
De sa tua arrundilis chi lestras
torrant in carinniu di allirghia
narendi: est berus, totu
-totu! - est poesia.











Nota:
Una donna parla al figlio chiamandolo piccolo maestro, sognatore di grandissimi sogni, perché attraverso di lui ha scoperto la poesia anche nel male di vivere, che sembra non volerci dare tregua. E così è possibile che la pioggia, il vento, come il cielo avaro, rivelino un volto diverso. Il bambino distilla "da oscure correnti d'angoscia la gioia di vivere". La poesia è particolarmente ricca di energia icastica profonda, che si sprigiona da una serie di immagini simboliche di sicura efficacia rappresentativa, grazie anche ad un lessico che non indulge a facili richiami di leggerezza, ma s'impone per la sua pregnanza semantica.

0 commenti: